Exodus 12

Umdabuko wePhasika

1UJehova wathi kuMosi lo-Aroni beseGibhithe, 2“Inyanga le kayibe yinyanga yokuqala kini, inyanga yokuqala emnyakeni wenu. 3Tshelani bonke abomndeni ka-Israyeli ukuthi ngelanga letshumi lale inyanga indoda ngayinye kayithathele abomuzi wayo izinyane libe linye indlu ngendlu. 4Aluba abendlu bebalutshwana kakhulu ukuthi bangake baliqede lelozinyane kababelane labomakhelwane abaseduze kwabo kusiya ngokuthi abantu lapho bangaki. Kumele ubone ukuthi umuntu emunye angadla inyama engakanani. 5Umele ukhethe amazinyane amaduna alomnyaka owodwa angelasici, njalo ungakhetha ezimvini loba ezimbuzini. 6Agcine amazinyane lawo kuze kube lusuku lwetshumi lane lwenyanga, lapho-ke sonke isizwe sika-Israyeli kumele siwaqume nxa kuhwalala.

7Lapho-ke kabathathe igazi baligcobe emaceleni laphezulu kwemigubazi yalezozindlu abazadlela khona amazinyane. 8Ngabona lobo busuku kabadle inyama yosiwe emlilweni, lesinkwa esingelamvubelo lemibhida ebabayo.

9Lingayidli inyama iluhlaza loba iphekiwe emanzini, kodwa yoseni emlilweni konke lenhloko yakhona lamangqina kanye lezangaphakathi. 10Lingatshiyi lutho lwayo kuze kube sekuseni; kuthi nxa kukhona okuseleyo kwayo ekuseni kumele likutshise.

11Liboyidla inkalo zenu zibotshiwe amanyathela egqokiwe, lezintonga zenu zisezandleni. Lidle ngokuphangisa; liPhasika likaJehova.

12“Ngabona lobobusuku ngizadabula phakathi kweGibhithe ngiwagongode wonke amazibulo awabantu lawezinyamazana – njalo ngizakwahlulela bonke onkulunkulu baseGibhithe. Mina nginguJehova. 13Igazi lizakuba yisibonakaliso sezindlu lapho elikhona lina; kuzakuthi ngingabona igazi ngedlule kini. Akulasijeziso esibhidlizayo esizalithinta lina nxa ngigadlaza iGibhithe.

14“Leli akube lilanga lesikhumbuzo, kuthi zonke izizukulwane ezizayo ziligcine ngomkhosi omkhulu kuJehova, kube yisimiso sanini lanini.

15“Okwezizinsuku eziyisikhombisa lizakudla isinkwa esingelamvubelo. Ngelanga lokuqala susani imvubelo ezindlini zenu, kuthi lowo odla loba yini elemvubelo ngelanga lokuqala kusiya kwelesikhombisa kumele akhutshwe ko-Israyeli. 16Ngelanga lokuqala akube lenkonzo engcwele, liphinde eyinye ngosuku lwesikhombisa. Lingawuthinti umsebenzi kulezi izinsuku ngaphandle kokulungisa ukudla kwabantu – yikho kodwa elingakwenza.

17Gcinani uMkhosi weSinkwa esingelamvubelo ngoba kwakumhla lokho engakhupha ngalo amaviyo enu eGibhithe. Gcinani leli ilanga njengesimiso sanini lanini kuzizukulwane ezizayo. 18Ngenyanga yokuqala libokudla isinkwa esingelamvubelo, kusukela kusihlwa ngelanga letshumi lane kuze kube kusihlwa ngelanga lamatshumi amabili lanye.

19Okwezizinsuku eziyisikhombisa makungaficwa mvubelo ezindlini zenu. Akuthi lowo odla loba yini elemvubelo asuswe aphele phakathi komndeni ka-Israyeli, lokuba engowezizweni loba owosendo. 20Lingadli lutho olufakwe imvubelo. Loba kungaphi elihlala khona libokudla isinkwa esingelamvubelo.”

21Kwathi uMosi wasebiza zonke izingwevu zako-Israyeli wathi kuzo, “Hambani khona manje liyokhetha amazinyane ezindlu zenu lihlabe izinyane lePhasika. 22Lithathe ilixha lentelezi yehisophi liyixube kanye legazi emganwini beselithatha elinye igazi liligcobe phezulu inxa zonke zomgubazi. Akungabi khona lamunye wenu ozaphuma emnyango wendlu yakhe kuze kuse. 23Lapho uJehova edabula phakathi kwelizwe egongoda amaGibhithe uzalibona igazi phezulu eceleni komnyango, aceze awedlule lowomnyango angamvumeli umbhubhisi ukungena endlini agadle.

24“Lalelani imilayo le njengezimiso zanini lanini kini lasezizukulwaneni zenu. 25Nxa lingangena elizweni uJehova azalinika lona njengokuthembisa kwakhe, liwugcine umkhosi lo. 26Nxa abantwabenu belibuza besithi, ‘Umkhosi lo ngowani?’ 27libatshele lithi, “UliPhasika lomhlatshelo kaJehova owadlula eceza izindlu zabako-Israyeli eGibhithe waphephisa imizi yethu mhla egongoda amaGibhithe.’ ” Khonapho abantu bakhothama bakhonza.

28Abako-Israyeli bakwenza lokho uJehova akuyala uMosi lo-Aroni.

29Phakathi kobusuku uJehova wawagongoda wonke amazibulo eGibhithe, kusukela ezibulweni likaFaro owayesesihlalweni sokukhosi kusiya ezibulweni lesibotshwa esasisentolongweni, kanye lamazibulo ezifuyo.

30UFaro lezikhulu zakhe zonke lawo wonke amaGibhithe bavuka ebusuku basiqhinqa isililo esikhulu eGibhithe ngoba kungekho ndlu layinye lapho okwakungafiwanga khona.

Ukuphuma eGibhithe

31Ebusuku uFaro wabiza uMosi lo-Aroni wathi, “Hambani! Sukani ebantwini bami, lina lama-Israyeli. Hambani liyekhonza uJehova njengokucela kwenu. 32Thathani imihlambi yenu, njengokutsho kwenu lihambe. Njalo ake lingibusise.”

33AmaGibhithe akhuthaza ukuthi baphangise baphume elizweni. Bathi, “Engxenye singafa sonke!”

34Ngakho abantu bathatha inhlama yabo yesinkwa ingakafakwa imvubelo bayithwala emahlombe ngemikolo yokuvubela igoqelwe ngamalembu.

35Ama-Israyeli enza lokho uMosi abayala khona bacela kumaGibhithe izinto ezenziwe ngesiliva langegolide kanye lezigqoko.

36UJehova wenza amaGibhithe aba lomusa abapha ingqe yilokho abakucelayo. Ngakho bawathintitha du amaGibhithe ngezimpahla zawo.

37Uhambo lwama-Israyeli lwasukela eRamasesi baqonda eSukhothi. Kwakulamadoda ayizinkulungwane ezingamakhulu ayisithupha behamba ngenyawo ngaphandle kwabesifazana labantwana.

38Abanye abantu nje abanengi bahamba labo kanye lemihlambi eminengi yezifuyo, izimvu lezinkomo.

39Inhlama abaphuma layo eGibhithe bapheka ngayo isinkwa esingelamvubelo. Inhlama leyo yayingelamvubelo ngokuba basuka eGibhithe sebexotshwa abazabe besaba lesikhathi sokuzilungisela umphako.

40Abako-Israyeli babehlale eGibhithe okweminyaka engamakhulu amane lamatshumi amathathu.

41Ekupheleni kwaleyominyaka engamakhulu amane lamatshumi amathathu kungeqanga suku wonke amaviyo asuka eGibhithe. 42Kwathi ngoba uJehova walinda ngalobobusuku esakhupha abako-Israyeli eGibhithe yikho-ke labo abako-Israyeli bonke bamele bawugcine umlindo lo behlonipha uJehova kuzo zonke izizukulwane ezizayo.

Izibopho zePhasika

43UJehova wathi kuMosi lo-Aroni, “Nansi imilayo yePhasika: “Akungabi lamuntu wezizweni olidlayo.

44Isigqili esithengiweyo singalidla nxa sesisokile,

45kodwa isethekeli sezizweni lesisebenzi esiqatshiweyo kabavunyelwa ukulidla.

46“Kalidlelwe endlini eyodwa, kungabi lanyama ephumela phandle kwendlu. Akungabi lathambo elephulwayo. 47Lonke ibandla lika-Israyeli kaliwugcine umkhosi lo.

48“Owezizweni ohlala phakathi kwenu nxa efuna ukulidla iPhasika likaJehova kasoke bonke abesilisa abahlala endlini yakhe. Laphoke usengahlanganyela adle njengabanini belizwe. Owesilisa ongasokwanga kangalidli.

49Umthetho lo ugoqela bonke abantu – abanini belizwe labemzini abahlala phakathi kwenu.”

50Bonke abako-Israyeli benza khonalokhu uJehova ayekulaye uMosi lo-Aroni. 51Njalo ngalona lelolanga uJehova wakhupha abako-Israyeli eGibhithe ngamaviyo abo.